Dëser Deeg misst all Walberechtegten säin Ziedel fir d’Walen zur Landwirtschaftskammer krut hunn. Do derbäi léit och en Ziedel, wéi de Wieler säin Ziedel muss ausfëllen, dass e valabel ass.
Mir wëllen hei op verschidde Punkten hiweisen, déi villäicht net ganz kloer eriwwer kommen:
- All Wieler huet 30 Stëmmen. E kann entweder de Krees iwwert enger vun de Lëschte schwärzen ODER e Kräiz dra maachen ODER e verdeelt seng 30 Stëmmen op déi Kandidaten, wou hie wëll, mat maximal 2 Stëmme pro Kandidat. Also zum Beispill 15 Kandidaten, déi all 2 Stëmme kréien. Méiglech ass awer och zum Beispill, 10 Kandidate jee zwou Stëmmen ze ginn an 10 anere jeeweils 1. Et gin nach aner Méiglechkeeten.
- Wéi bei de Gemengen- an Nationalwalen däerf den Ziedel NET erkenntlech gemaach ginn (duerch eng Notiz, Ënnerschrëft oder soss eppes).
- Wann ee fäerdeg gewielt huet, stécht een den Ziedel an déi kleng Enveloppe, déi derbäi louch, a pecht se zou. Déi gëtt dann an déi grouss gestach, déi och zougepecht gëtt. Déi grouss Enveloppe gëtt op der viischter Säit ënnert den „No de l’électeur“ ënnerschriwwen – awer just do! Da kann d’Enveloppe an d’Post goen. Se muss spéitstens den 13. Mäerz ofgestempelt ginn. De Stempel vun der Post zielt, net wéini dass d’Enveloppe ukënnt.
